الله من قلب تهيض مسيان=والدمع هلّت من عيونه قذاته
سمعت علم ثلج الصدر يافلا ن=عبر الرسايل وأعلنتها قناته
وأخترت من رمز المعاني بعنوان=من هاجسٍ ما بين ودّه وهاته
ونصيتها اللي عارف كل نيشان=أبو فهد ريف الضعيف وشفاته
راع الوفاء راع الكرم راع الإحسان=كم واحدٍ عمت عليه احسناته
هداج تيماء مرويٍ كل عطشان=ومن صافي الجمة تصدر رواته
قصر الرياض منوره ذرب الإيمان =اللي خدم نجدٍ بسيرة حياته
سلمان ما مثله مع الناس سلمان=حراً تنومس وقفته والتفاته
وليا تنهّض قفت العقب ذلان=يعرف نوايا اللي تقلب نواته
ساس الملوك مطوعة كل غلطان=بسيف صليب الراس يحذف جماته
لك الثناء والشكر يا طير حوران=يا منقذ اللي ميسن من حياته
عليه سيف الحق بالقص واعلان=لا طق بابٍ قال هذي وفاته
ترى الجهل مغرور وارهاق ورعان=في ساحة للعدل تبرك جناته
بين الرجا والياس لوعات وأحزان=وأقرب قريبٍ راح ينفض عباته
جاهم خبر مرسول باسباب سلمان=من عقب ما كلٍ توسد وصاته
تباشروا بالعفو قومٍ وصدقان=واللي سعى بالصلح واصلح رعاته
تشكر مساعي سيد الطيب سلطان=ابن الزعيم اللي يسوي سواته
أدى الأمانة ما تهاون ولا هان=يم البقوم وحقق الله مناته
ومشكور يا فيصل ولا انته بندمان=كلٍ دعى لك ساجدٍ في صلاته
يا شيخ فيصل وآمرك رب الإنسان=محدٍ ومرك بساعته ولحظاته
فعلك جميل واشتهر بين عربان=يامعتقٍ خضر الرقاب بكلماته
ترفع لك البيضاء على راس ما بان=قدم الملوك وفي محاكم قضاته
ربعك هل الطولات بالفعل سميان=عبر لهم راس القلم من دواته
روس البقوم اللي لهم مجد وعنان=يا سعد منهم بالمواقف حماته
وصلاة ربي عد ما كاينٍ كان=على نبيٍ نهتدي من هداته
الشاعر : برجس بن علي السهلي
قصيدة للشاعر برجس بن علي السهلي
